لو أنت مبتدأ.. المقال ده ليك 👌

موضوع أنهاردة للمبتدئين
مصطلحات و كلام غريب دايما بنسمعه لما بتحصل عندنا اصابة و طبعا معظمنا مش فاهمها

• الزرعة عندي مالها ⁉️.. لية وردتها بتقع قبل ما تفتح⁉️ و لية لونها باهت رغم اني باسمدها و مراعيها⁉️
  = اصلها مصابة بالحشرة من الحشرات الماصة
  لا لا.. ددي مصابة بالحشرات القشرية
  محتاجة مبيد كذا و كذا

مصطلحات كتييير غريبة علينا ك ناس لسة في الأول

تعالوا قبل اي شيء نقسم المبيدات ل اشهر 3 انواع بيعدوا علينا عشان نقدر نفهم كل نوعية منهم من غير لخبطة

1- المبيد الحشىري .. وده من اسمه بنستخدمه لما يكون في حشرات علي الزرعة
مثلا زي .. بيستيبان .. لمبادا .. الميلاثيون

طب بيشتغل ازاي عليها❓
مبدئيا هو بيشتغل عليها بالملامسة

يعني اييه ⁉️
بيعتمد في الابادة علي ان الرش او المبيد نفسه يلمس الحشرة.. يعني لازم كدة نجري وراها .. علي الساق بقي .. ظهر الورق .. البراعم الزهرية
باختصار منين ما تكون لازم الرش يوصلها
ولازم نركز ان ده يحصل

ليه❓
عشان لو وصل لحشرات و الباقي منها لا.. حاترجع تتكاثر تاني و تتعبنا .. كأننا معملناش حاجة
ف لازم الرش يكون رش بذمة يعني .. فوق و تحت و الساق و كله كله
بنرشه بالتركيز المناسب طبعا اللي بيكون مكتوب عليه او اللي نسأل فيه و يدلنا عليه الخبراء
مش نتصرف من دماغنا يا جماعة .. و مش نخلط ابدا مبيد ب مبيد تاني من غير استشارة
جدا غلط و ممكن يسبب ضرر لينا احنا قبل الزرع نفسه

2- المبيد الجهازي
ايه ده ؟ ايه الاسم الجامد ده ؟ يعني ايه طيب؟
ده فكرته انه لما بنرشه بيسري جوه العصارة بتاعة الزرعة نفسها .. تيجي الحشرات دي وواللي بتتغذي علي العصارة دي تمصه تموت
كأننا بنحطلها السم في اكلها يعني ..

طيب زي ايه ؟
عندنا كتير .. زي موسبيلان .. افينيو.. اميدور .. ليكس .. اوشين او اكتارا

النوع التالت معانا .. مبيدات خاصه بالعناكب

بنسميها مبيدات اكاروسية .. بنستخدمها لما الزرعة تصاب بالعنكبوت الأحمر ..
و غالبا الاصابة دي بتظهر في ظهر الورقة و بيكون لونها زي الصدا كده

طبعا في منها انواع كتير أشهرها.. ابازين.. او اي مبيد مادته الفعالة ابامكتين.
دمتم بخير 🌸