أوعي تشتري أي زرع من اللي في المقال ده لإنه زرع موسمي شتوي بس !

الحقيقة ده رأي كتير من العملاء ، اللي بيعتبروا الزرع الشتوي الجميل شيء ممنوع الإقتراب منه 😅

تلاقي العميل ينبهر حرفياً بشكل النبات وبعدين يسأل ده شتوي فا نقوله آه ، فا يعتلي وجهه علامات الحسره ويبص للزرعه بزعل و يختار حاجه تانيه ويمشي 🤷

علشان كده في البوست ده هقولك 5 أسباب ليه تشتري الزرع الشتوي الجميل وأنت مبسوط ومش زعلان :

1_ أولاً تفكيرنا نفسه إننا مش بنحب الحاجات المؤقتة وإنه لازم أي شيء نشتريه يعيش معانا العمر كله ده مش تفكير صح فا محتاجين نغيره علشان منضيعش حاجات كتير حلوة علي نفسنا كان ممكن تفرحنا حتي لو شويه صغيرة
، لإن الحاجات الدائمه بعد فتره بنعتاد وجودها ومش بنحس بقيمتها ، فا حلو إنها تختفي فتره ونستناها وتختفي وتوحشنا وهكذا ويبقي شغفنا بيتجدد تجاها. 🌷

2 _ تاني سبب المزهرات الشتويه مش بس إسبوع ولا إتنين دي بتفضل تلت السنه وفيه انواع ممكن تعيش لنصها ، يعني فعلا فتره مش قليله. 💪

3- المزهرات الشتويه مش غاليه خالص علي عكس انواع كتير يعني أسعارها بتبدأ من 20 لحد 30 جنيه ، مقارنه بشكلها في بلكونتك وتأثيرها عليك فا طبعاً تستحق جدا 👍

4_ أغلب النبات دائم الخضره بيحصله سكون في فتره الشتاء
يعني لو أنت من مقتني الأنواع دي غالبا بلكونتك في الشتاء مفهاش غير زرع عباره عن ورق أخضر بس ، وسايب الجمال الشتوي اللي كله أزهار هترجعك الربيع لمجرد إنه مش هيعيش معاك السنه كلها بنفس حلاوته 🥰

5_ فيه أنواع شتويه دائمه الخضره يعني هتوقف تزهير بس في فتره الصيف لكن هترجع تزهر تاني معاك في الشتاء.

بس كده ، التنوع في الزرع ومواسم تزهيره بجد حاجه جميله جدا جدا بتخليك تشوف الجمال بعينك طول السنه وتقول سبحان الله خلق فا أبدع
حلو تقتني كام زرعه دائمه لكن متضعيش علي نفسك فرصه الإستمتاع بزرعه جميله حتي لو هتعيش معاك شهر او اسبوع او حتي كام يوم لإن تأثيرها عليك وعلي روحك مش هيروح ابدا ♥️
دمتم محبين لعالم الزرع 🌿🌸